Արդվիի Սուրբ Հովհաննես վանք

Արդվիի վանքը կառուցված է Հովհաննես Գ Օձնեցու տապանաքարի շուրջ, որը տեղադրված է հյուսիսային եկեղեցու խորանի առջև։ Համալիրը գտնվում է Արդվի գյուղի հյուսիս-արևմտյան եզրին և բաղկացած է երկու իրար կցված թաղածածկ եկեղեցիներից, զանգակատունից և վանական շինությունների մնացորդներից։

XIII դարում եկեղեցու արևմտյան ճակատին ավելացվել է մեծ կամարակապ բացվածքով դահլիճ։ XVII դարում եկեղեցիներից հարավ կառուցվել է առանձին զանգակատուն՝ խորանարդաձև ստորին մասով, որն ավարտվում է վեցսյուն ռոտոնդայով։

Վանքի պարսպապատ տարածքում պահպանվել են խցերի և տնտեսական շինությունների ավերակներ։ Համալիրից արևմուտք գտնվում է միջնադարյան գերեզմանոց՝ խաչքարերով։ XIX դարում վանքը վերականգնել է Ստեփանոս Տարինյանը, իսկ 1902 թվականին այն կրկին նորոգել է Մելիքսեթ Կալանթարյանը։ 2018 թվականին «Տաշիր» բարեգործական հիմնադրամի նախագահ Վահե Կարապետյանն իրականացրել է համալիրի հերթական վերականգնումը։

Արդվիի վանքը գտնվում է Լոռու մարզում, Օձունին մոտ գտնվող Արդվի գյուղի եզրին, Երևանից ուղիղ գծով մոտ 94 կմ հյուսիս։